Tge è ina CPI?
Il Cussegl grond dal chantun Grischun surveglia tranter auter l'administraziun chantunala. Tenor l'art. 20 da la Lescha davart il Cussegl grond (LCG; DG 170.100) dal chantun Grischun po il Cussegl grond, suenter avair consultà la Regenza chantunala respectivamain las autoritads giudizialas supremas, incaricar ina cumissiun parlamentara d'inquisiziun, sche eveniments da gronda impurtanza en l'administraziun publica u giudiziala basegnan in scleriment spezial.
Ina cumissiun parlamentara d'inquisiziun (scursanì: «CPI») è il pli ferm instrument da surveglianza dal parlament ed ella posseda vasts dretgs d'infurmaziun. Uschia po ina CPI tranter auter interrogar persunas da l'administraziun sco perditgas e pretender invista da tut las actas uffizialas. Visavi ella na pon las autoritads betg sa referir al secret d'uffizi. Sin fundament dal fatg ch'il Cussegl grond incarichescha directamain la CPI ha quella ultra da quai in'auta legitimaziun politica per intercurir in object specific.
Il Cussegl grond ha decis ils 13 da zercladur 2018 unanimamain d'incaricar la CPI cartel da construcziun. Igl è l'emprima CPI en l'istorgia dal chantun Grischun.